“ Ang Unang Population Control at Aborsyon “

Ito ang mga anak ni Jacob na kasama niyang pumunta sa Egipto, pati ang kani-kanilang sambahayan: sina Ruben, Simeon, Levi, Juda, Isacar, Zabulon, Benjamin, Dan, Neftali, Gad at Aser, sila’y pitumpung lahat. Si Jose ay malaon nang nasa Egipto. At namatay si Jose, ang kanyang mga kapatid at ang kanilang sallinlahi. Ngunit mabilis ang pagdami ng mga Israelita kaya’t sila’y naging makapangyarihan at nalalaganapan nila ang buong lupain.
Lumipas ang panahon at ang Egipto’y nagkaroon ng ibang hari na walang anumang alam tungkol kay Jose. Sinabi niya sa kanyang mga kababayan, “ Nanganganib tayo sa mga Israelita. Sila’y patuloy na dumarami at lumalakas pa kaysa atin. Kailangang gumawa tayo ng paraan para mapigil ang kanilang pagdami. Baka tayo salakayin ng ating mga kaaway at umanib pa sila sa mga ito at pagkatapos ay umalis sa ating lupain”
Kaya’t naglagay sila ng mababagsik na tagapangasiwa upang pahirapan ang mga Israelita; ipinapagawa ng Faraon sa mga ito ang mga Lungsod ng Pitom at Rameses, lungsod na tingalan ng mga pagkain at kagamitan. Ngunit habang sinisikil, lalo naming dumarami at lumalaganap ang mga Israelita kaya’t kinapopotan at kinatatakutan ng mga Egipcio. Dahil dito, ang mga Israelita’y lalong sinikil at pinahirapan ng mga Egipcio sa paggawa ng tisa at ng iba’t – ibang mabibigat na gawaing bukid.
Isang araw, ipinatawag ng Faraon sina Sifra at Pua, ang mga hilot na nagpapaanak sa mga Hebrea, at tinagubilinan ng ganito: “ Sa pagpapaanak ninyo sa mga Hebrea, kung lalaki ang bata patayin ninyo”.
Pamilyar ba sa inyo ang kuwentong ito? Ito ay mababasa sa Exodo 1: 1 -16
Totoo ang kasabihang “ history, repeats itself”. Ganito ang nangyayari sa ating bansa sa ngayon. Patuloy nilang iginigiit na isabatas na ang RH Bill dahil dumarami na raw ang tao ang sanhi raw ng kahirapan at patuloy na paghihirap ng Pilipinas. Idagdag pa nila na marami raw kumplikasyon ang panganganak.
Kung babalikan natin ang kasaysayan ng Exodo, hindi ba may kaugnayan ang Population Control at Aborsyon? Pero sinasabi ng mga nagsusulong ng RH Bill, na tutol din sila sa aborsyon at Population Control lang ang kanilang isinusulong. Nagsisinungaling sila, dahil kakambal ng Population Control ang Abortion.
Huwag na natin sanang hayaan na maulit ang kasaysayan ng Exodo sa kasalukuyan nating panahon. Huwag tayong padala sa mga dikta ng mayayamang Bansa na gusto lamang kontrolin ang ating populasyon upang sila ang magpasasa sa ating mga likas na yaman. Napakayaman ng Pilipinas, hindi lamang sa mga likas na yaman, kundi pati na rin sa mga magagandang kultura at kaugalian, at likas na magagaling ang mga Pinoy! Huwag nating payagan na unti- unting mawala ang mga ito.

“ Kung Nasaan ang Espiritu ng Diyos, Naroon ang Kalayaan “

Sa darating na ika-labingdalawa ng Hunyo, ay ipagdiriwang ng aming parokya ang ika-walumpu’t limang pagkakatatag nito . Ang Pentekostes ay sinasabing kapanganakan ng buong Simbahan.
Sa Lumang Tipan, ang Pentekostes ay ang pag-aalay ng unang ani ng mga Israelita, bilang pasasalamat sa Poong Maykapal sa mahabang pagkakaalipin mula sa mga Egiphiyo.
Sa Bagong Tipan, araw ng Pentekostes, kung saan ang mga alagad ay nasa isang silid, kasama ang Birheng Maria ay nananalangin, nang biglang bumaba sa kanila ang Banal na Espiritu Santo sa anyong dilang apoy. Noong mga panahon na iyon ang mga alagad ay natatakot lumabas na baka sila ay hulihin at ipapako rin sa krus. Subalit nang bumaba ang Espiritu Santo sila ay nagkaroon ng lakas ng loob na lumabas at ipahayag ang Mabuting Balita sa lahat ng dako ng mundo.
Sa kasalukuyan nating panahon, ang Banal na Espiritu Santo ay patuloy na gumagabay at nagbibigay lakas sa mga mananampalataya. Nasaksihan natin ito noong EDSA 1 nang ang mga mananampalataya ay magkapit- bisig upang labanan ang mahabang diktadurya, na ang tanging naging sandata ay ang banal na rosaryo at mga panalangin laban sa mga naglalakihang kanyon. Muli nakamtan natin ang demokrasya .
Noong manawagan ang Arsobispo ng Maynila si Cardinal Rosales, noong Ika-dalawampu’t lima ng Marso, muli nating nasasaksihan na manindigan ang mga mananampalataya upang ipagtanggol ang buhay at tutulan ang RH Bill.
Ang Reproductive Health Bill ay banyagang panukalang batas. Kalakip ng panukalang batas na ito ang limpak-limpak na salapi solusyon daw sa ating kahirapan. Ang panukalang batas na ito ang muling aalipin sa atin maging sunud-sunuran sa kanilang kagustuhan dahil tayo ay nakatali sa isang kasunduan. Kasunduan na ang kapalit ay ang pagpapamudmod ng mga kontraseptibo na alam naman nating maraming masamang epekto sa katawan. Kakabit din nito ang mga mayayamang “manufacturer “ ng mga gamot, na solusyon naman daw sa mga lumalaganap na breast cancer, breast cancer, A.I.D.S. at kung anu-ano pa.
Ika-labingdalawa ng Hunyo, ginugunita rin natin ang ating Kalayaan. Tunay nga ba tayong malaya kung tayo ay natatakot sa banta na mayayamang bansa na hindi tayo pauutangin kung hindi natin isusulong ang RH Bill?
Nawa ang banal na Espiritu Santo ang patuloy nating maging gabay upang maging matatag at manindigan na ipagtanggol ang ating Inang Bayan at ang ating Inang Simbahan. “ Kung nasaan ang Espiritu ng Diyos, Naroon ang Kalayaan – 2 Cor. 3: 16 – 18 “.